2026-yil 30-oktabr kuni Hindistonning yetakchi «AMI Polymer Pvt. Ltd.» kompaniyasi vakillari — Darshan Gandi (Darshan Gandhi) va Vishnu Jangid (Vishnu Jangid) bilan amaliy uchrashuv bo‘lib o‘tdi.

Muzokaralarda ijrochi direktor Botir Nurmatov, xalqaro hamkorlik bo‘limi boshlig‘i Anvar Shernayev hamda xalqaro hamkorlik bo‘limi yetakchi mutaxassisi Sardor Rahimov ishtirok etdilar.

Uchrashuv davomida mehmonlarga oliygohning asosiy ta’lim yo‘nalishlari, ilmiy-tadqiqot salohiyati va zamonaviy moddiy-texnik bazasi haqida batafsil ma’lumot berildi. O‘z navbatida, Hindiston delegatsiyasi vakillari farmatsevtika, tibbiyot va kimyo sanoati tarmoqlari uchun biofarmatsevtik elastomerlar, silikon tizimlar va polimer buyumlar ishlab chiqarishga ixtisoslashgan «AMI Polymer Pvt. Ltd.» kompaniyasi faoliyati haqida so‘zlab berdilar.

Shuningdek, kompaniya vakillari uchun tanishuv ekskursiyasi tashkil etilib, uning doirasida mehmonlarga o‘quv binolari hamda kimyoviy tahlil va amaliy tadqiqotlar o‘tkazish uchun zamonaviy uskunalar bilan jihozlangan ixtisoslashtirilgan laboratoriya xonalari namoyish etildi.

Tomonlar kompaniyaning ishlab chiqarish imkoniyatlarini hamda polimer materiallar, kimyoviy texnologiyalar va farmatsevtika sohalarida ikki tomonlama hamkorlik istiqbollarini atroflicha muhokama qildilar. Muloqot chog‘ida ta’lim va ishlab chiqarish integratsiyasi masalalariga alohida e’tibor qaratildi, xususan:

• qo‘shma ilmiy-amaliy va tadqiqot loyihalarini amalga oshirish;
• talabalar uchun ishlab chiqarish amaliyotlari va stajirovkalarni tashkil etish;
• xorijiy mutaxassislar ishtirokida ixtisoslashtirilgan texnik treninglar, seminarlar va mahorat darslarini o‘tkazish.

Uchrashuv yakunida tomonlar o‘zaro manfaatli hamkorlikni rivojlantirish va uzoq muddatli sheriklik munosabatlarini yanada mustahkamlashdan manfaatdor ekanliklarini bildirdilar.