D.I. Mendeleyev nomidagi Rossiya kimyo-texnologiya universitetining Toshkent filialida universitet rektori, professor Sergey Nikolayevich Filatovning "TMK" AJ va "RND PARK" MChJ vakillari bilan uchrashuvi bo'lib o'tdi.

Uchrashuvda RXTU xalqaro faoliyat bo'yicha prorektori D.S. Kadimov, Toshkent filiali ijrochi direktori B.E. Nurmatov va xalqaro hamkorlik bo'limi boshlig'i A.N. Shernayev ishtirok etishdi. Hamkorlar tomonidan esa "TMK" AJ Fan, innovatsion ekotizim va raqamli texnologiyalar departamenti direktori B. Abdurahmonov, R&D loyihalarini muvofiqlashtirish bo'yicha bosh mutaxassis D.X. Ro'ziyev, "RND PARK" MChJ Kadrlar bo'limi boshlig'i O.M. Ahmedov, Bosh direktorning ilm-fan bo'yicha maslahatchisi Yu.N. Mansurov hamda departament vakili A. Mirxo'jayev qatnashdilar.

Uchrashuv davomida tomonlar kimyo sanoati uchun ilm-fan, innovatsiyalar va yuqori malakali kadrlar tayyorlash sohasidagi hamkorlikni rivojlantirish istiqbollarini muhokama qildilar. Ta'lim, fan va ishlab chiqarish integratsiyasi, qo'shma ilmiy-tadqiqot va tajriba-konstruktorlik (R&D) loyihalarini amalga oshirish, zamonaviy texnologiyalarni joriy etish, shuningdek, innovatsion ekotizimni rivojlantirish masalalariga alohida e'tibor qaratildi.

Uchrashuv ishtirokchilari quyidagi yo'nalishlar bo'yicha ikki tomonlama hamkorlik imkoniyatlarini batafsil ko'rib chiqdilar:

• qo'shma ilmiy laboratoriyalar yaratish;

• ilmiy tadqiqotlar natijalarini tijoratlashtirish;

• sanoat korxonalari bilan o'zaro aloqalarni kengaytirish;

• talabalarning ishlab chiqarish amaliyotini tashkil etish;

• professor-o'qituvchilar tarkibi malakasini oshirish;

• tarmoqning zamonaviy talablariga javob beradigan mutaxassislarni tayyorlash.

Uchrashuv yakunida tomonlar universitet, ilmiy tashkilotlar va sanoat korxonalari o'rtasida ilmiy-innovatsion faoliyatni, raqamli texnologiyalarni va samarali hamkorlikni rivojlantirishga qaratilgan sheriklik munosabatlarini yanada mustahkamlash va qo'shma loyihalarni amalga oshirishdan manfaatdor ekanliklarini tasdiqladilar.