2026-yil 22-iyun kuni Ozarbayjon Respublikasining Boku shahriga xizmat safari doirasida D.I. Mendeleyev nomidagi Rossiya kimyo-texnologiya universitetining Toshkent filiali Xalqaro aloqalar bo‘limi boshlig‘i Anvar Normamatovich Shernayev Ozarbayjon, turk va o‘zbek tadbirkorlari assotsiatsiyasi (АТУИАБ) raisi Ruslan Imanzade bilan uchrashuv o‘tkazdi.

Uchrashuv davomida tomonlar ta’lim, fan, innovatsiyalar va investitsiya faoliyati sohalarida hamkorlikning istiqbolli yo‘nalishlarini, jumladan, qo‘shma loyihalarni amalga oshirishga ozarbayjonlik tadbirkorlarni jalb qilish hamda ilmiy-innovatsion hamkorlikni rivojlantirish masalalarini muhokama qildilar.

Muzokaralar yakunida D.I. Mendeleyev nomidagi RKTU Toshkent filiali hamda Ozarbayjon, turk va o‘zbek tadbirkorlari assotsiatsiyasi (АТУИАБ) o‘rtasida ta’lim, fan va investitsiya sohalarida uzoq muddatli sheriklikni rivojlantirishga qaratilgan Hamkorlik memorandumi imzolandi.

Shuningdek, "Study in Uzbekistan" dasturi doirasida filial vakillari Ozarbayjon Respublikasining ta'lim agentligi — "Timeline" MChJ rahbariyati bilan uchrashdi. Uchrashuv yakuniga ko‘ra, Ozarbayjondan D.I. Mendeleyev nomidagi RKTU Toshkent filialiga abituriyentlarni o‘qishga jalb qilish bo‘yicha hamkorlik shartnomasi imzolandi.

Uchrashuv davomida agentlik vakillariga filial faoliyati, ta'lim dasturlari, xorijiy talabalarning o‘qish sharoitlari va qabul qoidalari haqida ma'lumot berildi. Ozarbayjon Respublikasidan bo‘lgan birinchi abituriyentga "Kimyoviy texnologiya" ta'lim dasturi bo‘yicha o‘qishga rasmiy taklifnoma topshirildi.

Imzolangan kelishuvlar O‘zbekiston va Ozarbayjon o‘rtasidagi ta'lim aloqalarini mustahkamlashga, xalqaro hamkorlikni kengaytirishga va D.I. Mendeleyev nomidagi RKTU Toshkent filialiga xorijiy talabalarni jalb etishga xizmat qiladi.